மெளனத்தின் விளிம்பில் 

தள்ளாடிக் கொண்டிருக்கிறேன் 

எப்பொழுது வேண்டுமானாலும் 

கால் இடறி வீழலாம்! 

எருமையின் பொறுமையை

அதைக் கலைத்தவனிடம் 

கேட்டுப்பாருங்கள்! 

அது தனது முன்னங்காலை தேய்த்து

பெருமூச்சு விட்டு முடிப்பதற்குள் 

தப்பித்து ஓடிவிடுங்கள்! 

-Bavananthan  | 21/06/2016

#PersonalDiary #LifeLessons

விருட்சத்தின் உச்சத்தை
தொட்டுவிட்டு

ஓடிவந்து வேர் நுனியை
முத்தமிட்டு

ஒட்சிசன் வாயுக்களோடு
கலந்து பறந்து

புவியீர்ப்பை எதிர்க்கும் சிறகுகளின்
சூத்திரம் அறிந்து

வானவில்லின் அழகியல்
அறிந்து

மழைத்துளிக்குள் சிலநாள்
வசித்து

பெண் மண் இயற்கை
மேடு பள்ளம்
காதல் காமம் அன்பு
புரட்சி தாய்மை

அனைத்தையும்
திகட்டத் திகட்ட ரசிக்கும்
கவிஞர்கள் படைக்கும்
கவிதைகள் தினம்!
-Bavananthan (22/03/2017) 

வெறுமையின் வறுமையினை
வேரறுத்து வீசிவிட்டு
தனிமையின் தலையணைக்குள்
தலை புதைக்கும் நேரம்

பொறுமையின் உச்சங்கள்
விரக்தியின் எச்சங்கள்
அணைந்த சில சொச்சங்கள்
ஆங்காங்கே மிச்சங்கள்

எதைக் கொண்டு கட்டியும்
ஆறாத காயங்கள்
எனைக் கொண்டு முட்டியும்
சேராத தாயங்கள்

காரணம் தேடியோடி
தவிப்புடன் தோகையாடி
மயில்களும் மேகம் தேடி
மழையதன் மோகம் நாடி

மண் தொட்டு முத்தமிட்டு
முளை தேடி எச்சமிட்டு
தொலைகின்ற எனைத்தேடி
தொடர்கிறது பயணங்கள்!

இனி!
-Bavananthan (20.03.2016) 

Photo Courtesy: Kabilan Vairamuthu

" காற்தடம் கூட பதியாமல்
நீ நடந்து சென்றதால்..
கடற்கரை மணலிலும்
ரோஜாக்கள் பூத்திருக்கின்றன.. "
- Bavananthan (2016)

தாகம் தான் எடுத்ததோ!
மழை நாடி மலர்ந்ததோ!
இருளுக்குப் பயந்ததோ!
ஒளிதேடி மலர்ந்ததோ!
எவர் கூறி இணைந்ததோ
யார் கூறி பிரிந்ததோ!

உண்மைகள் தெரியாமல்
உலகத்தை உணராமல்
விரித்த வலையினிலே
விரும்பியே விழுந்ததோ!

தேன் திருடன் தன் உடலைக் கண்டதுண்டமாய் வெட்டி வீழ்த்தி
தேனினைக் கவர்ந்து செல்ல
ஏமாந்து போய்ப் பாவம்
கதறித்தான் அழுததோ!
கவலையில் கிடந்ததோ!

தேன் வேட்டைக்காரன் தன்
கால் பட்டு ஒட்டியதோர்
தன் சக ஏமாளியின்
மகரந்தத் துகள் கொண்டு
அதிகமாய் தேன் கொண்டு
மறுபடி மலருமோ! - தேன்
திகட்டிட கொடுக்குமோ!
தேன் திருடனைப் பிடிக்குமோ!
அல்லது...
தான் மறுபடி இறக்குமோ!

-Bavananthan (27/01/2018)

-Bavananthan 

அந்த நாளுக்காக

ஐயையோ ஐயையோ என்று
ஓடிவந்தார் பெருமான் அங்கிள்
என்னப்பா என்ன என்று
கேட்டு முடிப்பதற்குள்...

ஆயிரம் மத்தளங்கள்
அடம்பிடித்து மிரண்டாற்போல்
அத்தனை பொருட்களையும்
உதைந்தே நொருக்கி விட்டார்

மெதுவாய் நூல் பிடித்து எரிய எத்தனித்த
டியூப்லைட் இயக்கியையும்
என்னதான் செய்தாரோ
எரிந்து எரிந்து அணைகிறது

ஏனிந்த அவசரம் அங்கிள்
என்னதான் பிரச்சனை என்றேன்
அடேயப்பா அதையேன் கேட்டாய்
என்று எரிந்து கொண்டார்

சொல்லி முடிப்பதற்குள் - உம்
சோலி முடிஞ்சிடுமோ?
விளங்கிற மாதிரிக் கொஞ்சம்
விவரமாய்ச் சொல்லித் தொலையும் என்றேன் 

மைனல் டிகிரியில பனிபடர்ந்த ஊர் இருக்கு
அந்த ஊருக்குள்ள என்னோட வீடு இருக்கு
அந்தக் குளிருக்குள்ள அன்றாடம் குளிக்கணுமாம்
அந்தக் குளிருக்குள்ள உறைஞ்சு கிடக்கணுமாம்

வேர்க்காத ஊருக்குள்ள
வாழுகின்ற நீரெல்லாம்
குளித்தால்தான் என்ன
குளிக்காட்டித்தான் என்ன என்றேன்! 

அடேய் சின்னப் பொடியா
உனக்கு விளங்கியென்ன பயன்
என்ற மனிசி என் தலையில் ஏறி நிக்கிறாளே!
சந்தன சோப்பையும் போடென்று கத்துறாளே!

திடுக்கிட்டு எழுந்து பார்த்தேன்
இடிமுழங்கி முடியவில்லை
மழை கொஞ்சம் ஓய்ந்தாலும்
நீரோடி வடியவில்லை!

எந்த ஏரியாவில் குளித்துக்
கொண்டு இருக்கிறாரோ!
என்னென்ன பொருளெல்லாம் - அங்கே
உடைந்து நொருங்கியதோ!

மத்தளங்கள் இடி முழங்க
சிவபெருமான் குளிக்கிறாராம்
தாத்தா சொன்ன கதை

புனைவு என்று தெரிந்த பின்னும்
நினைவில் நிற்கும் கதை
தாழமுக்கம் இருக்கும் மட்டும்
வாழும் இந்தக் கதை!

-Bavananthan